ශ්රී ලාංකිකයන් සඳහා ඉන්දීය වීසා නිකුත් කිරීම කඩිනම් හා පහසු ආකාරයෙන් සිදුකරන ප්රතිපත්තිය තවදුරටත් ක්රියාත්මක බව ඉන්දීය මහ කොමසාරිස් කාර්යාලය නිවේදනය කරයි.
එම නිවේදනයට අනුව, ඉන්දියාවට සංචාරය කිරීමට අපේක්ෂා කරන ශ්රී ලාංකිකයන්ට විද්යුත් (e-Visa) වීසා පහසුකම ද භාවිත කළ හැකිය.
ඉන්දීය මහ කොමසාරිස් කාර්යාලය හරහා සාමාන්ය වීසා අයදුම් කරන පුද්ගලයන් මුලින්ම අන්තර්ජාලය ඔස්සේ අයදුම්පත සම්පූර්ණ කළ යුතු අතර, ඉන් අනතුරුව කොළඹ, මහනුවර, යාපනය, හම්බන්තොට සහ මඩකළපුව පිහිටි ඉන්දීය කොන්සියුලර් අයදුම් මධ්යස්ථාන වෙත අවශ්ය ලේඛන භාරදිය යුතු බව දැනුම් දී ඇත.
බෞද්ධ සිද්ධස්ථාන ඇතුළු ආගමික වන්දනා චාරිකා සඳහා ඉන්දියාවට යන ශ්රී ලාංකිකයන්ගේ වීසා අයදුම්පත් ප්රමුඛතාව ලබාදී කඩිනමින් සකස් කරන බව ද එම කාර්යාලය සඳහන් කරයි.
බුද්ධශාසන, ආගමික හා සංස්කෘතික කටයුතු අමාත්යාංශයේ නිර්දේශය මත වන්දනාකරුවන් 10 දෙනෙකු හෝ ඊට වැඩි කණ්ඩායම් සඳහා නොමිලේ වීසා නිකුත් කිරීමේ වැඩසටහන නැවත ආරම්භ කර ඇති බව ද නිවේදනයේ දැක්වේ.
වීසා සේවා සපයන ආයතනය වෙනස් කිරීම හේතුවෙන් මෙම පහසුකම තාවකාලිකව අත්හිටුවා තිබූ අතර, නව සේවා සපයන්නා 2026 ජූලි 7 වැනිදා සිට සේවා ආරම්භ කිරීමත් සමඟ එය යළි ක්රියාත්මක කර ඇත.
එම ක්රමවේදය යටතේ කණ්ඩායම් වශයෙන් අයදුම් කළ හැකි අතර, ජෛවමිතික දත්ත ලබාදීම සඳහා කණ්ඩායමක් ලෙස හෝ පුද්ගලිකව ICAC මධ්යස්ථාන වෙත පැමිණීමේ පහසුකම ද සලසා ඇත.
නව ඉන්දීය රෙගුලාසි අනුව වයස අවුරුදු 12 සිට 70 දක්වා පුද්ගලයන් සියලු දෙනාටම ජෛවමිතික දත්ත ලබාදීම අනිවාර්ය වන අතර, එම දත්ත හේතුවෙන් ඉන්දියාවට පැමිණීමෙන් පසු ආගමන හා විගමන කටයුතු වඩාත් කාර්යක්ෂමව සිදුකරගත හැකි බව ද පෙන්වා දී තිබේ.
මෙම වැඩසටහන යටතේ අයදුම් කරන වන්දනාකරුවන්ගෙන් වීසා ගාස්තුවක් අය නොකරන බව ඉන්දීය මහ කොමසාරිස් කාර්යාලය අවධාරණය කරයි. කෙසේ වෙතත්, වීසා සැකසුම් සේවාව සඳහා ICAC ආයතනය වෙත රුපියල් 1,855ක සේවා ගාස්තුවක් ගෙවිය යුතු බව ද දැනුම් දී ඇත.
