ශ්රේෂ්ඨාධිකරණය සහ අභියාචනාධිකරණය තුළ පවතින විනිසුරු පුරප්පාඩු පිරවීමට ජනාධිපතිවරයා මෙතෙක් පියවර නොගැනීම ආණ්ඩුක්රම ව්යවස්ථාවට පටහැනි ක්රියාවක් බව ශ්රී ලංකා නීතීඥ සංගමය අවධාරණය කරයි.
ශ්රී ලංකා නීතීඥ සංගමයේ සභාපති නීතීඥ රජීව් අමරසූරිය මහතා සඳහන් කළේ, මේ වන විට ශ්රේෂ්ඨාධිකරණයේ සහ අභියාචනාධිකරණයේ විනිසුරු පුරප්පාඩු අටක් පවතින අතර, එම පුරප්පාඩු සඳහා නම් යෝජනා කිරීම ජනාධිපතිවරයාගේ ව්යවස්ථානුකූල වගකීමක් බවයි.
ඔහු පෙන්වා දුන්නේ, මාස ගණනාවක් තිස්සේ එම පත්කිරීම් ප්රමාද කිරීම ආණ්ඩුක්රම ව්යවස්ථාවේ විධිවිධාන මෙන්ම ස්ථාපිත සම්ප්රදායන් ද උල්ලංඝනය කිරීමක් ලෙස සැලකිය හැකි බවයි.
විනිසුරුවරුන්ගේ විශ්රාම වයස දීර්ඝ කිරීම සම්බන්ධයෙන් මීට සති කිහිපයකට පෙර රජයේ නියෝජිතයන් ඒ පිළිබඳව කිසිදු නිල ස්ථාවරයක් නොදැක්වූ බව සඳහන් කළ අමරසූරිය මහතා, නීතීඥ සංගමයේ අදහස් විමසීමකින් තොරව එවැනි යෝජනාවක් ඉදිරියට ගෙන ඒම පිටුපස බරපතළ ගැටලුකාරී තත්ත්වයක් පවතින බවටද චෝදනා කළේය.
එවැනි සංශෝධනයක් අවශ්ය නම් ඒ පිළිබඳව පුළුල් මහජන හා වෘත්තීය මට්ටමේ සංවාදයක් පළමුව පැවැත්විය යුතු බවත්, රජය එය ක්රියාත්මක කිරීමට අවංකව අපේක්ෂා කරන්නේ නම් ජනතාවගේ සෘජු කැමැත්ත ලබාගැනීම සඳහා ජනමත විචාරණයකට යොමු වීම සුදුසු බවත් ඔහු වැඩිදුරටත් සඳහන් කළේය.
මේ අතර, විනිසුරුවරුන්ගේ විශ්රාම වයස් සීමාව දීර්ඝ කිරීම සඳහා ඉදිරිපත් කර ඇති යෝජනාවට කැබිනට් මණ්ඩල අනුමැතිය හිමිව තිබේ.
අධිකරණ අමාත්ය හර්ෂණ නානායක්කාර මහතා ප්රකාශ කළේ, ජනාධිපති අනුර කුමාර දිසානායක මහතාගේ ප්රධානත්වයෙන් ඊයේ (27) පැවති කැබිනට් මණ්ඩල රැස්වීමේදී මෙම යෝජනාව අනුමත කළ බවයි.
ඒ අනුව ශ්රේෂ්ඨාධිකරණය, අභියාචනාධිකරණය ඇතුළු සියලු අධිකරණවල විනිසුරුවරුන්ගේ විශ්රාම වයස් සීමාව දීර්ඝ කිරීම සඳහා අවශ්ය නීතිමය පියවර ඉදිරියේදී ගැනීමට නියමිතය.
