මධ්යම කඳුකරයේ බටහිර බෑවුම් ප්රදේශවල පවතින අයහපත් කාලගුණික තත්ත්වය හේතුවෙන් හැටන් ශ්රී ලංකා ගමනාගමන මණ්ඩල (ලංගම) ඩිපෝවේ දෛනික ආදායම සැලකිය යුතු ලෙස පහළ ගොස් ඇති බව ඩිපෝ කළමනාකරු පාලිත විරසූරිය මහතා පවසයි.
ඔහු මාධ්ය වෙත අදහස් දක්වමින් සඳහන් කළේ, සාමාන්යයෙන් දිනකට රුපියල් ලක්ෂ 33ක පමණ ආදායමක් උපයන හැටන් ඩිපෝවේ දෛනික ආදායම මේ වන විට රුපියල් ලක්ෂ 10ත් 12ත් අතර මට්ටමට පහත වැටී ඇති බවයි.
සාමාන්ය දිනවල දුර ගමන් සහ කෙටි දුර සේවා සඳහා බස් රථ 75ක් පමණ ධාවනයට එක් කරන අතර, එම සේවාවන් භාවිත කරන මගීන් සංඛ්යාව 18,000 සිට 26,000 දක්වා වන බවද ඔහු පැවසීය.
කෙසේ වෙතත්, පසුගිය 03, 04 සහ 05 යන දිනවල පැවති අධික වර්ෂාව හේතුවෙන් දිනකට බස් රථ භාවිත කළ මගීන් සංඛ්යාව 9,218ත් 10,000ත් අතර ප්රමාණයකට සීමා වූ බවත්, ඒ හේතුවෙන් ඩිපෝවේ ආදායම සැලකිය යුතු ලෙස පහළ ගොස් ඇති බවත් ඩිපෝ කළමනාකරු සඳහන් කළේය.
අයහපත් කාලගුණය, පාසල් සඳහා නිවාඩු ප්රකාශයට පත් කිරීම සහ ජනතාවගේ ගමන් බිමන් සීමා වීම මගීන්ගේ සංඛ්යාව අඩුවීමට ප්රධාන හේතු වී ඇති බවද ඔහු පැවසීය.
මේ අතර, හැටන් ලංගම ඩිපෝවේ සේවකයන් 328 දෙනෙකු සේවය කරන බවත්, ඔවුන්ගේ මෙම මාසයේ වැටුප් ගෙවීම සඳහා අවශ්ය රුපියල් ලක්ෂ 138ක මුදල මේ වන විට උපයාගෙන ඇති බවත් පාලිත විරසූරිය මහතා වැඩිදුරටත් සඳහන් කළේය.
