රජයේ ජාතික නිවාස සංවර්ධන වැඩසටහන ක්රියාත්මක කිරීම සඳහා රුපියල් මිලියන 44,000ක මුදලක් වෙන් කර ඇති බව ග්රාමීය සංවර්ධන, සමාජ ආරක්ෂණ හා ප්රජා සවිබලගැන්වීම් අමාත්ය ආචාර්ය උපාලි පන්නිල මහතා පවසයි.
අමාත්යවරයා මේ බව සඳහන් කළේ අද (06) කොළඹ දිස්ත්රික්කයේ කැස්බෑව ප්රාදේශීය ලේකම් කොට්ඨාසයට අයත් පැලැන්වත්ත බටහිර ග්රාම නිලධාරී වසමේ, අස්වැසුම ප්රතිලාභී නිවාස අහිමි පවුලක් සඳහා “සුවපහසු නිවසක් – සවිබලැති පවුලක්” රන්විමන නිවාස වැඩසටහන යටතේ ඉදිකළ නිවසක් ප්රදානය කිරීමේ අවස්ථාවට එක්වෙමිනි.
ජාතික නිවාස වැඩසටහන යටතේ මෙම වසර තුළ අඩු ආදායම්ලාභී නිවාස අහිමි පවුල් 30,000කට නව නිවාස ලබාදීම රජයේ ඉලක්කය බවද අමාත්යවරයා ප්රකාශ කළේය.
නිවාස, ඉදිකිරීම් හා ජලසම්පාදන අමාත්යාංශය, ප්රවාහන, මහාමාර්ග හා නාගරික සංවර්ධන අමාත්යාංශය සහ වැවිලි හා ප්රජා යටිතල පහසුකම් අමාත්යාංශය ඇතුළු රේඛීය අමාත්යාංශ කිහිපයක ඒකාබද්ධ දායකත්වයෙන් මෙම ජාතික නිවාස ව්යාපෘතිය ක්රියාත්මක වන බවද ඔහු සඳහන් කළේය.
සමෘද්ධි සංවර්ධන දෙපාර්තමේන්තුව පමණක් මෙම වසර තුළ නිවාස 1,000කට අධික සංඛ්යාවක් ඉදිකිරීමට සැලසුම් කර ඇති අතර, දිවයිනේ සෑම ප්රාදේශීය ලේකම් කොට්ඨාසයකම අවම වශයෙන් නිවාස තුන බැගින් ඉදිකිරීම එහි ප්රධාන ඉලක්කයක් බවද අමාත්යවරයා පැවසීය.
මෙම වැඩසටහන නිවාස ලබාදීමකට පමණක් සීමා නොවන බවත්, අසල්වාසීන්, ඥාතීන් සහ රාජ්ය නිලධාරීන්ගේ සහයෝගයෙන් සමාජීය බැඳීම් ශක්තිමත් කරමින් සවිබලගැන්වූ පවුල් සහ ප්රජාවක් ගොඩනැගීම ද එහි අරමුණ බවත් ආචාර්ය උපාලි පන්නිල මහතා වැඩිදුරටත් අවධාරණය කළේය.
