පසුගිය දිනවල පැවති අධික වර්ෂාපතනය හේතුවෙන් දිට්වා සුළි කුණාටුවෙන් බලපෑමට ලක්වූ ප්රදේශ යළි සක්රීය වීමේ අවදානමක් මතුව ඇති බව ජාතික ගොඩනැඟිලි පර්යේෂණ සංවිධානය (NBRO) පවසයි.
එම සංවිධානයේ ජ්යෙෂ්ඨ විද්යාඥ ආචාර්ය වසන්ත සේනාධීර මහතා සඳහන් කළේ, පවතින වර්ෂා තත්ත්වය හමුවේ පස ජලයෙන් සංතෘප්ත වී ඇති බැවින් නායයෑම්, ගල් පෙරළීම් සහ පස්කඳු සෝදායෑමේ අවදානම ඉහළ ගොස් ඇති බවයි.
කුඩා වර්ෂාපතනයක් පවා ඇතැම් ප්රදේශවල නායයෑම් අවදානම් තත්ත්වයන් ඇති කිරීමට හේතු විය හැකි බැවින් ජනතාව වැඩි අවධානයකින් කටයුතු කළ යුතු බවද ඔහු අවධාරණය කළේය.
කාලගුණ පුරෝකථන අනුව හෙට (07) සහ අනිද්දා (08) දිනවල වැසි තත්ත්වය තවදුරටත් වර්ධනය විය හැකි බව සඳහන් කළ ආචාර්ය වසන්ත සේනාධීර මහතා, අධික තීව්රතාවයෙන් යුතු වර්ෂාපතනයත් සමඟ පස් කණ්ඩි කඩා වැටීම් සහ ගල් පෙරළීම් සිදුවීමේ අවදානම පවතින බවද පැවසීය.
මාර්ග භාවිතයේදී අවදානම් ස්ථාන පිළිබඳව සැලකිලිමත් වන ලෙසත්, ඇළ මාර්ග ආශ්රිතව ජීවත් වන ජනතාව වඩාත් අවධානයෙන් පසුවන ලෙසත් NBRO ජනතාවට දැනුම් දෙයි.
ජල උල්පත් මතුවීම, ලයිට් කණු ඇලවීම, පොළොවේ වෙනස්කම් ඇතිවීම වැනි නායයෑම් පෙර සලකුණු දක්නට ලැබුණහොත් වහාම එම ස්ථානවලින් ඉවත් වී ආරක්ෂිත ස්ථාන වෙත යොමුවන ලෙසද දැනුම් දී තිබේ.
පසුගිය දින කිහිපයේ පැවති අයහපත් කාලගුණ තත්ත්වය හේතුවෙන් කෑගල්ල දිස්ත්රික්කයෙන් සිදුවීම් 15ක් සහ නුවරඑළිය දිස්ත්රික්කයෙන් සිදුවීම් 4ක් ඇතුළුව සමස්ත සිදුවීම් 21ක් වාර්තා වී ඇති බවද ආචාර්ය වසන්ත සේනාධීර මහතා සඳහන් කළේය. එමෙන්ම නායයෑම් හේතුවෙන් මරණ 5ක් වාර්තා වී ඇති බවද ඔහු පැවසීය.
ජාතික ගොඩනැඟිලි පර්යේෂණ සංවිධානය සතු ස්වයංක්රීය වර්ෂාමාන 330කට ආසන්න සංඛ්යාවක් මඟින් වර්ෂා තත්ත්වයන් අඛණ්ඩව නිරීක්ෂණය කරන අතර, කාලගුණවිද්යා දෙපාර්තමේන්තුව සහ වාරිමාර්ග දෙපාර්තමේන්තුව සතු දත්ත පද්ධතිද පැය 24 පුරා අධ්යයනය කරමින් පවතින බව සඳහන් කළේය.
අධික වර්ෂා තත්ත්වයක් හෝ අවදානම් තත්ත්වයක් ඇතිවුවහොත් ඒ සම්බන්ධයෙන් කඩිනම් අනතුරු ඇඟවීම් නිකුත් කිරීමට පියවර ගන්නා බවද NBRO පවසයි.
