මාස නවයක සිරදඬුවමක් නියම වී සිටින බොදු බල සේනා සංවිධානයේ ප්‍රධාන ලේකම් පූජ්‍ය ගලගොඩඅත්තේ ඥානසාර හිමියන්ට එරෙහි නඩුකරය ලබන පෙබරවාරි මස 25 වැනිදා නැවත කැඳවීමට කොළඹ මහෙස්ත්‍රාත් අධිකරණය අද (07) නියෝග කළේය.
මෙම නඩුව අද අධිකරණය හමුවේ කැඳවූ අවස්ථාවේදී උන්වහන්සේ ගිහි ඇඳුමින් සැරසී අධිකරණයට ඉදිරිපත් කර සිටීම විශේෂත්වයකි.
එහිදී ඥානසාර හිමියන් වෙනුවෙන් පෙනී සිටි නීතිඥවරයා අධිකරණය හමුවේ කරුණු දක්වමින් කියා සිටියේ, අදාළ සිරදඬුවම් තීන්දුවට එරෙහිව සිය සේවාදායක හිමියන් විසින් මේ වන විට ශ්‍රේෂ්ඨාධිකරණය හමුවේ අභියාචනයක් ගොනුකර ඇති බවයි. එම අභියාචනයේ අවසන් තීරණය ලැබෙන තෙක් මෙම දඬුවම ක්‍රියාත්මක කිරීම කල්තබන ලෙසද උන්වහන්සේගේ නීතිඥවරයා අධිකරණයෙන් ඉල්ලා සිටියේය.
ඉදිරිපත් වූ කරුණු සලකා බැලූ කොළඹ මහෙස්ත්‍රාත් අධිකරණය, නඩුව නැවත විභාග කිරීම පෙබරවාරි මස 25 වැනිදා දක්වා කල්තැබීමට තීරණය කළේය.
