සබරගමුව විශ්වවිද්‍යාලයේ තාක්ෂණ පීඨයේ දෙවැනි වසරේ ඉගෙනුම ලැබූ 23 හැවිරිදි චරිත් දිලීෂාන් නමැති සිසුවා සිය දිවිනසාගෙන මියයාමට නවක වද සිද්ධියක් බලපෑවේ යැයි කියන චෝදනාව අනුව එහි පාලක සභාව එම සරසවියේ සිසුන් 11 දෙනෙකු ඉන් නෙරපා හැරීමට තීරණය කර තිබෙනවා.
මියගිය සිසුවාට සහ අනෙකුත් සිසුන්ට හිරිහැර කිරීම සහ ශාරීරික මානසික තර්ජන එල්ල කිරීමට අදාළ බරපතල විනය විරෝධී ක්‍රියා සම්බන්ධයෙන් වූ නිල පරීක්ෂණ වාර්තාව ශ්‍රී ලංකා සබරගමුව විශ්වවිද්‍යාලයේ පාලක සභාව විසින් පසුගිය සතියේ දී නිකුත් කරනු ලැබුවා.
අදාළ තීරණයට අනුව, සබරගමුව විශ්වවිද්‍යාලයේ ශිෂ්‍යයකු ලෙස මෙම සිසුන්ගේ ලියාපදිංචිය ස්ථිරව ම අහෝසි කරනු ලබන අතර, අභ්‍යන්තර ශිෂ්‍යයකුගේ කිසිදු අයිතිවාසිකමක් හෝ වරප්‍රසාදයක් තවදුරටත් හිමි නොවනු ඇත.
උපකුලපතිවරයාගේ පූර්ව ලිඛිත අවසරයකින් තොර ව විශ්වවිද්‍යාල භූමියට, පියසවලට, නේවාසිකාගාර පරිශ්‍රවලට හෝ විශ්වවිද්‍යාල මගින් පාලනය වන යම් දේපලකට ඇතුළුවීම හෝ රැඳී සිටීම ඒ අනුව මෙම සිසුන්ට සපුරාම තහනම් වනවා.
2025 වසරේ අප්‍රේල් මාසයේ 29 වැනිදා චරිත් දිලීෂාන් නම් සිසුවා ඔහුගේ නිවස තුළදී සිය දිවි නසාගෙන සියදිවි නසා ගෙන තිබුණා.
විශ්වවිද්‍යාලය තුළ ක්‍රියාත්මක වූ දැඩි නවකවදය සහ ශාරීරික මානසික හිංසන දරාගැනීමට නොහැකිව, ඔහු තම නිවසේ දී දිවි නසාගත් බව ඔහුගේ මවුපියන් සඳහන් කළ අතර, ඒ සම්බන්ධයෙන් පොලීසිය සහ අපරාධ පරීක්ෂණ දෙපාර්තමේන්තුව මගින් විශේෂ පරීක්ෂණයක් ද සිදු කරනු ලැබුවා.
