හිටපු ජනාධිපති ගෝඨාභය රාජපක්ෂ මහතාගේ පෞද්ගලික ලේකම් සහ නව ජනතා පෙරමුණේ නායක සුගීෂ්වර බණ්ඩාර මහතා ලබන 21 වැනිදා දක්වා තවදුරටත් රක්ෂිත බන්ධනාගාරගත කිරීමට කොටුව මහේස්ත්‍රාත් පසන් අමරසේන මහතා අද (07) නියෝග කළේය.
ජනාධිපති වැය ශීර්ෂය යටතේ තනතුරු දෙකක් සඳහා එකවර වැටුප් ලබා ගැනීමේ චෝදනාව සම්බන්ධයෙන් අත්අඩංගුවට ගෙන සිටින සැකකරු අද අධිකරණය හමුවට ඉදිරිපත් කළ අවස්ථාවේ දී මෙම නියෝගය ලබා දුන්නේය. සිද්ධිය සම්බන්ධයෙන් වන විමර්ශන මෙතෙක් අවසන් වී නොමැති බව මධ්‍යම අපරාධ විමර්ශන කාර්යාංශය කළ දැනුම් දීම සැලකිල්ලට ගනිමින් මහේස්ත්‍රාත්වරයා මෙම පියවර ගත්තේය.
මේ අතර, අදාළ නඩුව කොටුව මහේස්ත්‍රාත් අධිකරණයේ සිට කොළඹ ප්‍රධාන මහේස්ත්‍රාත් අධිකරණය වෙත මාරු කරන ලෙස සැකකරු වෙනුවෙන් පෙනී සිටි ජනාධිපති නීතිඥ මෛත්‍රී ගුණරත්න මහතා ඉල්ලීමක් කළ අතර, ඒ පිළිබඳ නියෝගය ඉදිරි දිනයක දී ප්‍රකාශයට පත් කරන බව අධිකරණය වැඩිදුරටත් සඳහන් කළේය.
