පූජ්‍ය ගලගොඩඅත්තේ ඥානසාර හිමියන් නිදහස් කරගැනීමේ අරගලයේ පළමු පියවර ලෙස උලපනේ සුමංගල හිමියන්ගේ ප්‍රධානත්වයෙන් අද (10) මහනුවර දළදා මාලිගාව ඉදිරිපිට අධිෂ්ඨාන සත්‍යක්‍රියාවක් පැවැත්වීමට කටයුතු යොදා තිබේ. මේ අතර, ඥානසාර හිමියන්ගේ චීවරය ඉවත් කිරීමට බන්ධනාගාර බලධාරීන් ගෙන ඇති තීරණය බලරහිත කරන ලෙස ඉල්ලමින් පූජ්‍ය තීනියාවල පාලිත හිමියන් විසින් බන්ධනාගාර කොමසාරිස් ජනරාල්වරයා ඇතුළු පිරිසකට එරෙහි ව අභියාචනාධිකරණයට රිට් පෙත්සමක් ද ඉදිරිපත් කර ඇත.
තවද, කෝට්ටේ ශ්‍රී කල්‍යාණී සාමග්‍රී ධර්ම මහා සංඝ සභාවේ අනුනායක පූජ්‍ය කොටපිටියේ රාහුල නාහිමියන් ජනාධිපති අනුර කුමාර දිසානායක මහතා වෙත ලිපියක් යොමු කරමින් පවසා ඇත්තේ ඥානසාර හිමියන් තම සංඝ සභාවේ භික්ෂුවක් බැවින් උන්වහන්සේ චීවරයේ තබා ගැනීම හෝ ඉවත් කිරීම පිළිබඳ අවසන් බලය ඇත්තේ තම සංඝ සභාවට බවයි. එම නිසා ඥානසාර හිමියන් යළි අධිකරණයට ඉදිරිපත් කිරීමට පෙර, අදාළ ඇමැතිවරුන් සහ බෞද්ධ කටයුතු කොමසාරිස් ජනරාල්වරයා ද සමඟ කෝට්ටේ රාජමහා විහාරයේ දී සාකච්ඡාවකට එක්වන ලෙස උන්වහන්සේ ජනාධිපතිවරයාගෙන් ඉල්ලා සිටිති.
මේ අතර, ත්‍රෛනිකායික මහානාහිමිවරුන්ගේ නියෝජිතයන් සහ ජනාධිපතිවරයා අතර පැවැති සාකච්ඡාවක දී, වසර 3කට වඩා සිරගත වන භික්ෂූන්ගේ සිවුරු ඉවත් කිරීම වැළැක්වීමට බන්ධනාගාර නිලධාරීන්ට දැනට පවතින නීතියෙන් බලයක් නැති බව පෙන්වා දී තිබේ. ඒ අනුව, මහා සංඝරත්නයේ යෝජනාවකට අනුව, බන්ධනාගාරගත වන භික්ෂූන් සම්බන්ධයෙන් අදාළ නිකායේ නිර්දේශ මත පමණක් ක්‍රියාත්මකවන පරිදි ඉදිරි සති දෙක තුළ නව රෙගුලාසි මාලාවක් සකස් කිරීමට ජනාධිපතිවරයා අධිකරණ අමාත්‍යවරයාට උපදෙස් දී ඇත.
Leave a Comment
Leave a Comment
