සිරගත වන භික්ෂූන් වහන්සේලා බන්ධනාගාරයෙන් බැහැරට ගෙන යාමේදී අනුගමනය කළ යුතු ක්‍රියාමාර්ග සම්බන්ධයෙන් පවතින ගැටලු සාකච්ඡා කිරීම සඳහා ත්‍රෛනිකායික මහානායක මාහිමිපාණන් වහන්සේලාගේ නියෝජිත මහා සංඝරත්නය සහ ජනාධිපතිවරයා අතර පසුගිය 09දා පැවති සාකච්ඡාව පිළිබඳව මල්වතු මහා විහාර පාර්ශ්වය විසින් නිල වශයෙන් කරුණු පැහැදිලි කර තිබෙනවා.
මහා විහාර පාර්ශ්වය නිකුත් කළ නිවේදනයක දැක්වෙන්නේ, 2026 ඔක්තෝබර් 07 දිනැතිව බන්ධනාගාර කොමසාරිස්තුමන් වෙත යොමු කරන ලද ලිපියෙන් මතු කරන ලද කරුණ ඉතාමත් සාධාරණ බවත්, එවැනි කරුණක් හේතුවෙන් ශාසනික වශයෙන් මතුවිය හැකි ගැටළු පිළිබඳව එතුමන් පිළිගන්නා බවත් ජනාධිපතිතුමන් ප්‍රකාශ කළ බවයි.
එසේම, වසර 3කට වැඩි කාලයක් සිරගත කිරීමට නියම වන භික්ෂූන් වහන්සේ නමක් බන්ධනාගාරයෙන් බැහැරට සිවුර සහිතව රැගෙන යාම වත්මන් බන්ධනාගාර නීතිමය රාමුව තුළ කළ නොහැකි වුවද, ඊට අදාළව නීතිමය සංශෝධන සිදු කිරීමට පියවර ගන්නා බව ජනාධිපතිවරයා එහිදී පවසා තිබෙනවා.
මෙම සාකච්ඡාව සඳහා සහභාගී වූ අනුනායක මාහිමිපාණන් වහන්සේ ඇතුළු ලේඛකාධිකාරී නායක ස්වාමීන්වහන්සේලා පෙන්වා දී ඇත්තේ, පවතින නීතිමය තත්ත්වය හේතුවෙන් පූජ්‍ය ගලගොඩඅත්තේ ඥානසාර හිමියන්ගේ සිවුර ඉවත් කිරීමේ සිදුවීම බෞද්ධ ජනතාව තුළ බලවත් කණගාටුවක් සහ සංවේදීතාවක් ඇති කර ඇති බවයි.
විශේෂයෙන්ම වසර 40 කට අධික කාලයක් සිවුර දරාගෙන කටයුතු කළ සමාජයේ විවිධ ගැටළු පිළිබඳව කාලකාලීන සාකච්ඡා සම්බන්ධයෙන් මෙවැනි තත්ත්වයක් උදාවීම බෞද්ධ සමාජය තුළ දැඩි සංවේදී කරුණක් බව මහානායක හිමිවරුන් අවධාරණය කර තිබෙනවා.
ඒ අනුව, යම් භික්ෂුවක් වරදකරු කොට වසර 03 කට අධික කාලයකට සිරගත කිරීමට නියම කෙරෙන අවස්ථාවක, අදාළ භික්ෂූන් වහන්සේ අයත් වන නිකාය හෝ පාර්ශ්වය වෙත ඒ පිළිබඳව දන්වා, අදාළ නිකායේ/පාර්ශ්වයේ නිර්දේශ මත එකී භික්ෂූන් වහන්සේගේ සිවුරුවර බැහැරට නොගෙන යාම සම්බන්ධයෙන් කටයුතු කිරීමට අදාළ රෙගුලාසි තදින් සකස් කර ක්‍රියාත්මක කිරීමට කටයුතු කරන ලෙස මහා සංඝරත්නය මෙහිදී යෝජනා කර ඇත්තේ.
මෙම යෝජනාව ඉතා සුදුසු එකක් බව පිළිගත් ජනාධිපතිවරයා, සති දෙකක් ඇතුළත අදාළ රෙගුලාසි සකස් කර අවසන් කරන ලෙස අධිකරණ අමාත්‍යාංශයට උපදෙස් ලබා දී ඇති අතර, ඉදිරියේදී එවැනි අවාසනාවන්ත තත්ත්වයන් මඟහරවා ගැනීමට අවශ්‍ය නීතිමය රාමුව සකස් කෙරෙනු ඇති බවත් එම නිවේදනයේ සඳහන්.
