කොළඹ ප්රදේශයේ පදිංචි තරුණියකගේ ඡායාරූප කීපයක් අසභ්ය ඡායාරූප ලෙස විකෘති කර අන්තර්ජාලය ඔස්සේ ප්රචාරය කළ බව කියන කොළඹ බාලිකා විද්යාලයක ඉගෙනුම ලැබූ සිසුවියකට කොළඹ ප්රධාන මහේස්ත්රාත් අසංග එස් බෝදරගම අද (12) රුපියල් පනස්දහසක වන්දියක් හා රුපියල් 5000ක දඩයක් නියම කර ඇති බව වාර්තා වේ.
අගතියට පත් කාන්තාවගේ ඡායාරූප මුහුණු පොතෙන් උපුටාගෙන අසභ්ය ඡායාරූප බවට විකෘති කිරීම හා එම ඡායාරූප අන්තර්ජාලය ඔස්සේ බෙදා හැරීම යන චෝදනා දෙකට වෙන් වෙන් වශයෙන් රුපියල් 2500 බැගින් දඩ හා රුපියල් 25000 බැගින් වන්දි නියම කෙරුණි.
ඒ අනුව අගතියට පත් කාන්තාවට රුපියල් විසි පන්දහස බැගින් රුපියල් පනස්දහසක මුදලක් ගෙවන ලෙසට විත්තිකාර තරුණියට අධිකරණයෙන් නියම කර ඇත.
අදාල නඩුව අද අධිකරණය හමුවේ නැවත කැඳවූ අවස්ථාවේදී සිද්ධිය සම්බන්ධයෙන් තමන් වරද පිළිගන්නා බවට විත්තිකාර තරුණිය අධිකරණය හමුවේ පැවසීම හේතුවෙන් ඇයට එසේ දඩ හා වන්දි නියම කර ඇත.
කොළඹ ප්රදේශයේ පදිංචි කාන්තාව අපරාධ පරීක්ෂණ දෙපාර්තමේන්තුවේ පරිගණක අපරාධ විමර්ශන අංශයට කරන ලද පැමිණිල්ලක් අනුව එම අංශය මගින් සැකකාර තරුණියට එරෙහිව චෝදනා ගොනුකර තිබුණි.
විත්තිකාර තරුණිය කොළඹ බාලිකා විද්යාලයක අධ්යාපනය ලැබූ තැනැත්තියක් බවත් ඇය මෙවර පැවැත්වෙන අධ්යාපන පොදු සහතික උසස් පෙළ විභාගයට බාහිර අපේක්ෂිකාවක් වශයෙන් පෙනී සිට ඇති බවටද අධිකරණයෙන් අනාවරණය වී ඇත.
