හිටපු රාජ්ය බුද්ධි අංශ ප්රධානී විශ්රාමික මේජර් ජෙනරල් සුරේෂ් සලේ අත්අඩංගුවට ගනු ලැබුවේ ත්රස්තවාදය වැළැක්වීමේ තාවකාලික විධිවිධාන පනත යටතේ බවත් ඒ අනුව පැය 72ක් රඳවාගෙන ප්රශ්න කරන බවත් පොලීසිය පවසයි.
සුරේෂ් සලේ අත්අඩංගුවට ගනු ලැබුවේ පාස්කු ප්රහාරය සම්බන්ධයෙන් තිබූ සාක්ෂි මත පදනම්ව බව ද බස්නාහිර පළාත භාර ජ්යෙෂ්ඨ නියෝජ්ය පොලිස්පති සජීව මැදවත්ත කියා සිටියි.
පොලිස් මාධ්ය කොට්ඨාසයේ පැවති විශේෂ මාධ්ය හමුවකට එක්වෙමින් ඔහු වැඩිදුරටත් සඳහන් කළේ, මේ සම්බන්ධයෙන් දීර්ඝ විමර්ශනයක් සිදුකළ යුතුව ඇති බැවින් ඒ පිළිබඳ තොරතුරු ඉදිරියේ දී අනාවරණය කරන බවයි.
එම හේතුව පැය කිහිපයක් තුළ අනාවරණය කිරීම අපහසු බවද සඳහන් කර සිටි ජ්යෙෂ්ඨ නියෝජ්ය පොලිස්පති සජීව මැදවත්ත, පොලීසියේ කාර්ය නිසි ලෙස ඉටුකර ඇති බවත් කියා සිටියේය.
අත්අඩංගුවට ගත් හේතුව නිසි ලෙස අනාවරණය නොකර විශ්රාමික මේජර් ජෙනරල් සුරේෂ් සලේ අත්අඩංගුවට ගැනීම හේතුවෙන් පොලීසියට එරෙහිව කැම්පේන් එකක් සිදුව ඇති බවට මාධ්යවේදීන් අසන ලද පැනයට පිළිතුරු දෙමින් ඔහු වැඩිදුරටත් පවසා සිටියේ, ඔහුව අත්අඩංගුවට නොගෙන සිටියේ නම් පොලීසියට විරුද්ධව කැම්පේන් සිදුවිය යුතුව තිබූ බවයි.
එමෙන්ම විශ්රාමික මේජර් ජෙනරල් සුරේෂ් සලේගෙන් ඉදිරියේ දී සිදුකරනු ලබන ප්රශ්න කිරීම්වලදී පාස්කු ප්රහාරයේ මහ මොළකරු පිළිබඳ තොරතුරු අනාවරණය කරගැනීමට හැකියාව ලැබෙනු ඇති බවත් ජ්යෙෂ්ඨ නියෝජ්ය පොලිස්පති සජීව මැදවත්ත පැවසීය.
මේ අතර මෙම මාධ්ය හමුවට එක්වු නීති දිසාව භාර, නියෝජ්ය පොලිස්පති ජාලිය සේනාරත්න පවසා සිටියේ, ත්රස්තවාදය වැළැක්වීමේ තාවකාලික විධිවිධාන පනත යටතේ පුද්ගලයෙකු අත්අඩංගුවට ගැනීමේ දී දින 3ක් රඳවා ගැනීමේ හැකියාව හිමිවෙන බවයි.
ඉන් අනතුරුව සාක්ෂි මත පදනම්ව රඳවා ගැනීමේ නියෝගයක් ලබාගැනීමට කටයුතු කළ හැකි බවද පැවසු ඔහු, ඒ සඳහා නෛතික ප්රතිපාදන ඇති බවත් කියා සිටියේය.
සුරේෂ් සලේ අත්අඩංගුවට ගැනීම සම්බන්ධයෙන් මහජනතාව දැනගත යුතු කරුණු සම්බන්ධයෙන් ඉදිරියේ දී දැනුවත් කරන බවද නියෝජ්ය පොලිස්පති ජාලිය සේනාරත්න පැවසීය.
රාජ්ය බුද්ධි සේවයේ හිටපු අධ්යක්ෂ විශ්රාමික මේජර් ජෙනරාල් සුරේෂ් සලේ මහතා අපරාධ පරීක්ෂණ දෙපාර්තමේන්තුව විසින් අද උදෑසන අත්අඩංගුවට ගනු ලැබුවේ පාස්කු ඉරුදින ත්රස්ත ප්රහාරය සම්බන්ධයෙන් සිදුකරන විමර්ශනවලට අදාළවයි.
2019 වසරේ අප්රේල් 21 වැනිදාට යෙදුණු පාස්කු ඉරුදිනයේ සහරාන් හෂීම් ප්රමුඛ මිලේච්ඡ අන්තවාදීන් කණ්ඩායමක් දිවයිනේ ස්ථාන 08කදී සිදුකළ මරාගෙන මැරෙන ප්රහාර 10කදී පුද්ගලයින් 273ක් ජීවිතක්ෂයට පත්වුණි.
අනතුරුව අදාළ ප්රහාර මාලාව සම්බන්ධයෙන් විමර්ශන ඇරඹි අතර පාර්ලිමේන්තු විශේෂ කාරක සභාවක් සහ ජනාධිපති විමර්ශන කොමිෂන් සභාවක් ඔස්සේද විමර්ශන සිදුකෙරුණි.
එකී සියලු විමර්ශනවලින් අනාවරණය වූ කරුණු මත ත්රස්ත ප්රහාරය සිදුකළ කණ්ඩායම් සමඟ සෘජුව සම්බන්ධතා පවත්වා තිබූ නවුෆර් මවුලවි ඇතුළු විත්තිකරුවන් 25 දෙනෙකුට එරෙහිව කොළඹ ස්ථීර ත්රිපුද්ගල මහාධිකරණය හමුවේ අධිචෝදනා ගොනුකෙරුණු අතර එම නඩුව මේ වනවිට දිනපතා විභාග කෙරෙමින් පවතී.
මෙවැනි පසුබිමක පාස්කු ඉරුදින ප්රහාරය පිටුපස ඇති දේශපාලන හස්තයක් ඇතැයි දිගින් දිගටම ඇතැම් පාර්ශ්ව චෝදනා කළ අතර වත්මන් ආණ්ඩුව බලයට පත්වීමෙන් පසු ඒ සම්බන්ධයෙන් විමර්ශන කඩිනම් කෙරුණි.
ඒ අතරවාරයේ බ්රිතාන්යයේ චැනල් ෆෝ නාළිකාව විසින් විකාශය කරනු ලැබු SRI LANKA’S EASTER BOMBINGS ; DISPATCHES යන වාර්තාමය වැඩසටහන හරහා හිටපු හමුදා බුද්ධි ප්රධානී මේජර් ජෙනරාල් සුරේෂ් සලේ සහ තවුහිද් ජමාත් සාමාජිකයන්ගේ සහභාගිත්වයෙන් පැවති හමුවකදී රාජපක්ෂවරුන් යළි බලයට ගෙන ඒම සඳහා රට තුළ අනාරක්ෂිත තත්ත්වයක් ඇතිකිරීමට යෝජනා වූ බවට චෝදනා එල්ලකරනු ලැබීය.
ඒ කලක් පිල්ලෙයාන්ගේ මාධ්ය ප්රකාශක ලෙස කටයුතු කළ, දැන් ස්විට්සර්ලන්තයේ දේශපාලන රැකවරණ පතන අසාද් මව්ලානා සිදුකළ ප්රකාශයත් සමගින්ය.
එසේම පාස්කු ඉරුදින ත්රස්ත ප්රහාරය සම්බන්ධයෙන් අපරාධ පරීක්ෂණ දෙපාර්තමේන්තුව සිදුකළ රහසිගත විමර්ශනයක් පිළිබඳ පසුගිය සමයේ අවස්ථා කිහිපයකදී කොටුව මහේස්ත්රාත් අධිකරණය වැඩිදුර වාර්තා මගින් කරුණු දක්වා තිබුණි.
මෙවන් පසුබිමක රාජ්ය බුද්ධි සේවයේ හිටපු අධ්යක්ෂ විශ්රාමික මේජර් ජනරාල් සුරේෂ් සලේ අද පෙරවරුවේ අපරාධ පරීක්ෂණ දෙපාර්තමේන්තුවේ අත්අඩංගුවට පත්ව තිබුණේ පෑලියගොඩ ප්රදේශයේදීය.
