දෙමටගොඩින් පසුගියදා හමුවූ මෙරට නිෂ්පාදිත ගිනිඅවි 18ට සමාන ගිනිඅවි 02 ක් මෝදර ප්රදේශයෙන් මධ්යම අපරාධ විමර්ශන කාර්යාංශය විසින් සොයාගෙන තිබේ. ඒ, මෝදර නිපුන නම් විදෙස්ගතව සැඟව සිටින සංවිධානාත්මක අපරාධකරුගේ සහෝදරයා වන මෝදර චතුර නමැත්තාගෙන් සිදුකළ ප්රශ්න කිරීම්වලදීය.
මෙම සැකකරු පසුගියදා ඩුබායිහී සිට මෙරටට පිටුවහල් කරනු ලැබීය.
මේ වනවිට ඔහු දින 90ක් රඳවාගෙන ප්රශ්න කෙරෙන අතර එහිදී අනාවරණ කරගත් තොරතුරු අනුව, මෙරට නිෂ්පාදිත ටී කටස් වර්ගයේ ගිනිඅවි 02 ක් මෝදරදී සොයාගෙන ගැණුනි. ඒ අනුව මෙම ගිනිඅවි සියල්ල එකම පුද්ගලයෙකු නිෂ්පාදනය කර ඇතැයි සැකකරන බවත් ඔහුව සොයා පුළුල් විමර්ශනයක් ආරම්භ කර ඇති බවත් පොලිසිය සඳහන් කරයි.
දිගින් දිගටම පොලිසිය ගිනිඅවි අත්අඩංගුවට ගැනීම හේතුවෙන් මේ වනවිට අපරාධකරුවන්ට ගිනිඅවි හිඟයක් ඇතිවී තිබෙන බවත් ඒ හේතුවෙන් ඔවුන් මෙරට තුළ ගිනිඅවි නිෂ්පාදනය කිරීමට කටයුතු කරන බවට තොරතුරු ලැබී ඇති බවත් උසස් පොලිස් නිලධාරියෙක් පැවසීය.
