ජනාධිපති වැය ශීර්ෂය යටතේ වැටුප් 2 ක් ගෙන ඇති බවට සැකපිට රක්ෂිත බන්ධනාගාර ගත කර සිටින හිටපු ජනාධිපති ගෝඨාභය රාජපක්ෂගේ පෞද්ගලික ලේකම් ලෙස කටයුතු කළ සුගීෂ්වර බණ්ඩාරගේ ඇප ඉල්ලීම පිළිබඳ නියෝගය ජූලි 8 වන දින ප්රකාශයට පත් කරන බවත්, එතෙක් සැකකරු රිමාන්ඩ් භාරයට පත් කරන බවත් කොටුව මහේස්ත්රාත් පසන් අමරසේන නියම කළේය.
මෙම පැමිණිල්ල කැඳවූ අවස්ථාවේ, විමර්ශන කටයුතු සිදු කරන මධ්යම අපරාධ විමර්ශන කොට්ඨාසයේ නිලධාරීන් හිටපු ජනාධිපති ගෝඨාභය රාජපක්ෂගෙන් ප්රකාශයක් සටහන් කරගත් බවට අධිකරණය හමුවේ කරුණු දක්වා ඇත.
ඒ අනුව, අදාළ ලේකම් දීමනාව තමන් විසින් ලබා ගත් බවත් තමාගේ පෞද්ගලික ලේකම්වරයා වශයෙන් මෙම සැකකරු පත් කරන ලෙස තමන් විසින් සිදු කරන ලද ඉල්ලීමකට අනුව ජනාධිපති ලේකම්වරයා විසින් ඊට අදාළ මුදල් ගෙවන ලෙස ජනාධිපති කාර්යාලයේ මූල්ය අංශ ප්රධානියාට නියම කරනු ලැබූ බව ද හිටපු ජනාධිපතිවරයා විසින් ප්රකාශ කර ඇත.
එම ප්රකාශය සම්බන්ධයෙන් විමර්ශන නිලධාරීන් විසින් තවදුරටත් කරුණු දක්වනු ලබන්නේ රනිල් වික්රමසිංහගේ පාලන සමයේ මෙම සැකකරු විශේෂ ව්යාපෘති අධ්යක්ෂ ජනරාල්වරයා වශයෙන් පත් කරනු ලැබ ඇති බවත් එම ව්යාපෘති අංශයේ 6 දෙනෙකුගෙන් ඒ පිළිබඳ ප්රකාශ සටහන් කරගත් බවත් ය.
එසේ ප්රකාශ ලබා දුන් තිදෙනෙකුම එම විශේෂ ව්යාපෘති අංශයෙන් කිසිදු වැඩක් නොවූ බවට ප්රකාශ කර ඇති අතර,තවත් දෙදෙනෙකු සඳහන් කර ඇත්තේ එම ව්යාපෘති අංශය හරහා සම්පූර්ණයෙන්ම දේශපාලන කටයුතු පමණක් සිදු වූ බවයි.
තවද මෙම විශේෂ ව්යාපෘතියට පුද්ගලයන් 135 දෙනෙකු පමණ තාවකාලික පදනම මත බඳවාගෙන ඇති අතර, එම බඳවාගැනීම්, වාහන, ඉන්ධන වැනි කටයුතු සඳහා රුපියල් කෝටි 22කට වැඩි මුදලක් වැය කර තිබෙන බවයි.
