2027 වසර තුළ නව පරම්පරාවේ ස්මාර්ට් කණ්ණාඩියක් වෙළඳපොළට හඳුන්වාදීමට ඇපල් සමාගම සූදානම් වන බව විදෙස් තාක්ෂණික මාධ්ය වාර්තා කරයි.
දැනට වෙළඳපොළේ පවතින ස්මාර්ට් කණ්ණාඩි භාවිතය හේතුවෙන් පෞද්ගලිකත්වය සම්බන්ධයෙන් මතුව ඇති ගැටලු සැලකිල්ලට ගනිමින්, නව උපාංගයේ සැලසුම් කිරීමේදී පරිශීලක දත්ත ආරක්ෂාවට විශේෂ අවධානයක් යොමු කර ඇති බව සඳහන් වේ.
විශේෂයෙන්ම මෙටා සමාගමේ ස්මාර්ට් කණ්ණාඩි භාවිත කරමින් පුද්ගලයන්ට නොදැනෙන ආකාරයෙන් ඡායාරූප හා වීඩියෝ පටිගත කළ හැකි වීම පිළිබඳව ලොව පුරා විවේචන එල්ල වී තිබේ. මේ හේතුවෙන් එවැනි උපාංග පෞද්ගලිකත්වයට තර්ජනයක් බවට ඇතැම් පාර්ශ්ව පෙන්වා දී ඇත.
බ්ලූම්බර්ග් වාර්තා අනුව, ඇපල් සමාගම මෙම ගැටලුවලට පිළියම් ලෙස නව ස්මාර්ට් කණ්ණාඩියේ විශේෂ ආරක්ෂක ක්රමවේද කිහිපයක් හඳුන්වාදීමට අපේක්ෂා කරයි.
ඒ අනුව, උපාංගයෙන් රැස්වන දත්ත බාහිර Server වෙත යොමු නොකර කණ්ණාඩිය තුළම සැකසීමට සැලසුම් කර ඇති අතර, පරිශීලකයන්ගේ පෞද්ගලික දත්ත හෝ පටිගත කිරීම් කෘත්රිම බුද්ධි පද්ධති පුහුණු කිරීම සඳහා භාවිත නොකරන බව ද සඳහන් වේ.
එමෙන්ම, සාමාන්ය කැමරාවක් වෙනුවට අවට පරිසරය හඳුනාගැනීමට පමණක් හැකි, ඡායාරූප හෝ වීඩියෝ පටිගත කිරීමට නොහැකි විශේෂ සෙන්සර් පද්ධතියක් මෙම උපාංගයට ඇතුළත් විය හැකි බවද වාර්තා පෙන්වා දෙයි.
මෙම ස්මාර්ට් කණ්ණාඩිය 2027 ජූනි මාසයේ පැවැත්වීමට නියමිත WWDC සංවර්ධක සමුළුවේදී ප්රථම වරට එළිදැක්වීමෙන් අනතුරුව, එම වසරේ අවසාන භාගයේදී වෙළඳපොළට නිකුත් කරනු ඇතැයි අපේක්ෂා කෙරේ.
