දිවයිනේ විදුලිබල සම්ප්රේෂණ උපපොළ 16ක් ආශ්රිතව ස්ථාපිත කිරීමට සැලසුම් කර ඇති වාණිජ මට්ටමේ බැටරි බලශක්ති ගබඩා පද්ධතිවල ඉදිකිරීම් කටයුතු මේ වන විට අවසන් අදියරට පැමිණ තිබේ.
අදාළ බැටරි පද්ධති මැයි සහ ජුනි මාසවලදී අවස්ථා තුනකදී කොළඹ වරාය හරහා මෙරටට රැගෙනවිත් ඇති අතර, අනුරාධපුර උපපොළ ආසන්නයේ පෞද්ගලික සමාගමක් විසින් ඉදිකරනු ලබන බැටරි බලශක්ති ගබඩා ව්යාපෘතියේ වැඩකටයුතු මේ වන විට සියයට 85කින් පමණ අවසන් කර තිබේ.
දිවා කාලයේ සූර්ය බල පද්ධති මඟින් නිපදවන අතිරික්ත විදුලිය බැටරි තුළ ගබඩා කර, රාත්රී කාලයේ විදුලි ඉල්ලුම ඉහළ යන අවස්ථාවලදී එම විදුලිය ජාතික විදුලිබල පද්ධතියට මුදාහැරීම මෙම ව්යාපෘති හරහා සිදු කිරීමට නියමිතය.
එමඟින් ජාතික විදුලිබල පද්ධතියේ ස්ථාවරත්වය තවදුරටත් පවත්වා ගැනීමට හැකි වන අතර, රාත්රී කාලයේ ඩීසල් විදුලි බලාගාර භාවිතයෙන් ලබාගන්නා විදුලි ප්රමාණයද අඩු කර ගැනීමට හැකි වනු ඇතැයි අපේක්ෂා කෙරේ.
එක් බැටරි බලශක්ති ගබඩා ව්යාපෘතියක් මඟින් මෙගාවොට් 10ක විදුලිබල ධාරිතාවක් ජාතික පද්ධතියට සැපයීමට හැකි වන අතර, එහි පාලන සහ කළමනාකරණ කටයුතු බලශක්ති අමාත්යාංශයට අයත් National System Operator Ltd (NSO) සමාගම විසින් සිදු කිරීමට නියමිතය.
බැටරි පද්ධතිවල නඩත්තු කටයුතු අදාළ පෞද්ගලික සමාගම් වෙත පැවරෙන අතර, පරිසරයට අවම බලපෑමක් ඇති කරමින් වඩාත් ස්ථාවර බලශක්ති සැපයුමක් සහතික කිරීම මෙම ව්යාපෘතිවල ප්රධාන අරමුණක් වී තිබේ.
මෙම ව්යාපෘති හරහා ලැබෙන ප්රතිලාභ ඉදිරියේදී විදුලි පාරිභෝගිකයන් වෙත ලබාදීමට රජය කටයුතු කරමින් සිටින බවද සඳහන් වේ.
මේ අතර, තවත් විදුලිබල සම්ප්රේෂණ උපපොළ 23ක් ආශ්රිතව බැටරි බලශක්ති ගබඩා පද්ධති ස්ථාපිත කිරීම සඳහා අවශ්ය ප්රසම්පාදන කටයුතු මේ වන විට ක්රියාත්මක වෙමින් පවතී.
දැනට ස්ථාපිත කෙරෙන බැටරි පද්ධති තුළ ගබඩා කරන විදුලිය අවශ්යතාව අනුව ජාතික විදුලිබල පද්ධතියට මුදාහැරීම සැප්තැම්බර් මස මුලදී ආරම්භ කිරීමට හැකිවනු ඇතැයි ව්යාපෘති ඉදිකිරීම් කටයුතු සිදුකරන සමාගම්වල බලධාරීන් ප්රකාශ කර තිබේ.
