ඓතිහාසික ශ්රී දළදා මාළිගාවේ ඇසළ පෙරහැර මංගල්යයේ පළමු කුඹල් පෙරහැර අද (18) රාත්රියේ වීථි සංචාරය කිරීමට නියමිතව තිබේ.
අදින් ආරම්භ වන කුඹල් පෙරහැර දින පහක් පුරා පැවැත්වෙන අතර, ලබන 23 වැනිදා සිට රන්දෝලි පෙරහැර වීථි සංචාරය කිරීමට නියමිතය. මෙවර පෙරහැර මංගල්යයේ අවසන් රන්දෝලි පෙරහැර ලබන 27 වැනිදා රාත්රියේ පැවැත්වීමට සැලසුම් කර ඇත.
මේ අතර, අද පැවැත්වෙන පළමු කුඹල් පෙරහැර වෙනුවෙන් පොලීසිය විසින් විශේෂ ආරක්ෂක සහ රථවාහන සැලැස්මක් ක්රියාත්මක කර තිබේ. ඒ අනුව නගරයේ රථවාහන ගමනාගමනය සඳහා විකල්ප මාර්ග කිහිපයක් ද හඳුන්වා දී ඇත.
පළමු කුඹල් පෙරහැර රාත්රී 6.52ට ශ්රී දළදා මාළිගාවෙන් ආරම්භ වී දළදා වීදිය, කොළඹ වීදිය, යටිනුවර වීදිය සහ රජ වීදිය ඔස්සේ ගමන් කර යළි ශ්රී දළදා මාළිගාවට ගෙවැදීමට නියමිතය.
පෙරහැර පැවැත්වෙන කාලය තුළ කටුගස්තොට දෙසින් මහනුවර නගරයට පැමිණෙන බර වාහන මහයියාව හන්දියෙන් තිලක් රත්නායක මාවත ඔස්සේ පොලිස් හන්දිය හරහා නගරයට ඇතුළුවිය හැකිය.
එම දෙසින් පැමිණෙන සැහැල්ලු වාහන ඩී.එස්. සේනානායක වීදිය ඔස්සේ පැමිණ හරස් වීදිය හරහා යටිනුවර වීදියට පිවිස, මීරමක්කම් පල්ලිය අසලින් වමට හැරී තිලක් රත්නායක මාවත ඔස්සේ ගමන් කළ හැකිය.
කටුගස්තොට දෙසට පිටවන වාහන සඳහා ද පොලිස් හන්දියෙන් තිලක් රත්නායක මාවත ඔස්සේ මහයියාව දෙසට ගමන් කිරීමට අවස්ථාව සලසා තිබේ.
තැන්නේකුඹුර සහ අම්පිටිය දෙසින් පැමිණෙන වාහනවලට සංඝරාජ මාවත ඔස්සේ වේල්ස් පාර්ක් හන්දියට පැමිණ, ඇහැලේපොළ කුමාරිහාමි මාවත ඔස්සේ බෝගම්බර සහ දුම්රිය ස්ථානය දෙසට ගමන් කළ හැකිය. රජපිහිල්ල මාවත හන්දියෙන් පල්ලිය පාර ඔස්සේ මහනුවර නගරයට ඇතුළුවීමට ද හැකියාව පවතී.
මහනුවර නගරයේ සිට අම්පිටිය සහ තෙල්දෙණිය දෙසට ගමන් කරන වාහන ඔරලෝසු කණුව වටරවුමෙන් දළදා වීදිය ඔස්සේ පැමිණ, රැජින හෝටලයේ පැති දොරටුව අසලින් ජෝයි බෝට්ටු සේවය පසුකර සංඝරාජ මාවත ඔස්සේ ගමන් කළ හැකිය.
එමෙන්ම බෝගම්බර වටරවුමෙන් ඇහැලේපොළ කුමාරිහාමි මාවත, රජපිහිල්ල මාවත සහ වේල්ස් පාර්ක් හන්දිය හරහා සංඝරාජ මාවත ඔස්සේ අම්පිටිය සහ තැන්නේකුඹුර දෙසට ගමන් කිරීමට ද හැකියාව ඇත.
කොළඹ දෙසින් මහනුවර නගරයට පැමිණීමට මෙන්ම නගරයෙන් කොළඹ දෙසට පිටවීමට විලියම් ගොපල්ලව මාවත සහ පැරණි පේරාදෙණිය මාර්ගය දෙපසටම භාවිත කළ හැකි බව පොලීසිය සඳහන් කරයි.
එබැවින් පෙරහැර පැවැත්වෙන කාලසීමාවේ මහනුවර නගරයට පැමිණෙන ජනතාව සහ රියදුරන් පොලීසිය විසින් හඳුන්වා දී ඇති රථවාහන සැලැස්මට අනුව කටයුතු කරන ලෙස පොලීසිය ඉල්ලා සිටී..
