වත්මන් රජයට ප්රජාතන්ත්රවාදී ක්රමවේද පිළිබඳ නිසි අවබෝධයක් හෝ පළපුරුද්දක් නොමැති වීම හේතුවෙන් සමස්ත ප්රජාතන්ත්රවාදී පද්ධතියම විනාශ කිරීමට කටයුතු කරමින් සිටින බව විපක්ෂ නායක සජිත් ප්රේමදාස මහතා පවසයි. ඒ මහතා මේ බව ප්රකාශ කළේ විපක්ෂ නායක කාර්යාලයේ දී පැවැති සමගි නීතිඥ සංගමයේ සාමාජික හමුවකට එක්වෙමිනි.
ප්රජාතන්ත්රවාදී නිදහස ආරක්ෂා කිරීම සඳහා රාජ්යයේ ප්රධාන කුළුණු තුන අතර බලය බෙදී යාම සහ සංවරණ හා තුලන ක්රියාවලිය අත්යවශ්ය සාධකයක් වන නමුත්, වත්මන් රජය එම බලය බෙදීයාමේ පද්ධතිය සම්පූර්ණයෙන් ම අහෝසි කිරීමට උත්සාහ කරන බවට විපක්ෂ නායකවරයා චෝදනා කළේය.
එක්සත් රාජධානිය වැනි දියුණු රටවල විනිසුරුවරුන්ගේ විශ්රාම වයස වැඩි කිරීම වැනි තීරණ ගනු ලැබුවේ වසර දෙකකට වැඩි කාලයක් පුරා සියලු පක්ෂ හා පාර්ශ්වකරුවන් සමඟ විවෘත සාකච්ඡා පවත්වා පොදු එකඟතාවයකට පැමිණීමෙන් පසුව බව පෙන්වා දුන් ඒ මහතා, වත්මන් රජය 22 වැනි සංශෝධනය ගෙන ඒමේ දී එවැනි කිසිදු සාකච්ඡාමය හෝ ප්රජාතන්ත්රවාදී ක්රියාවලියක් අනුගමනය නොකළ බව සඳහන් කළේය.
ප්රජාතන්ත්රවාදය සුරැකීම වෙනුවෙන් ජාති, ආගම්, කුල හෝ පක්ෂ භේදයකින් තොර ව රටේ ලක්ෂ 220ක ජනතාව එකමුතු විය යුතු බව අවධාරණය කළ විපක්ෂ නායකවරයා, විධායකයේ වගවීම තහවුරු කිරීම සඳහා ගම්, වසම්, දිස්ත්රික්, පළාත් සහ ජාතික මට්ටමින් “ප්රජාතන්ත්රවාදී මණ්ඩප” ස්ථාපිත කළ යුතු බවට ද යෝජනා කළේය. මහජන සෛරීත්වය තහවුරු කිරීමේ මෙම සටනට නායකත්වය දීමට විපක්ෂයේ සියලු කණ්ඩායම් සමඟ එක්ව කටයුතු කිරීමට තමන් සූදානම් බව ද ඔහු මෙහි දී වැඩිදුරටත් පැවසීය.
එසේම, සමගි නීතිඥ සම්මේලනය හරහා මහජනතාව වෙනුවෙන් නොමිලේ නීති උපදෙස්, ජංගම නීති සේවා සහ නීති සායන ආරම්භ කිරීමට සැලසුම් කර ඇති බවත්, මූලික හා මානව අයිතිවාසිකම් යන්න දේශපාලන හා සිවිල් අයිතිවාසිකම්වලට පමණක් සීමා නොකර සමාජීය, ආර්ථික හා ආගමික අයිතිවාසිකම් දක්වා පුළුල් කළ යුතු බවත් විපක්ෂ නායකවරයා මෙහි දී පෙන්වා දුන්නේය.
