හිටපු ජනාධිපති ගෝඨාභය රාජපක්ෂ මහතාගේ පෞද්ගලික ලේකම්වරයෙකු ලෙස කටයුතු කළ සුගීෂ්වර බණ්ඩාර මහතා ජූලි 08 වනදා දක්වා යළි රක්ෂිත බන්ධනාගාරගත කිරීමට කොළඹ කොටුව මහේස්ත්රාත් අධිකරණය අද (01) නියෝග කළේය.
ජනාධිපති වැය ශීර්ෂය යටතේ වැටුප් දෙකක් ලබාගත් බවට එල්ල වී ඇති චෝදනා සම්බන්ධයෙන් සැකපිට ඔහු රිමාන්ඩ් භාරයේ පසුවෙයි.
අද පෙරවරුවේ සැකකරු අධිකරණයට ඉදිරිපත් කළ අවස්ථාවේදී, ඔහු විසින් ගොනු කර තිබූ ඇප ඉල්ලීම පිළිබඳ නියෝගය ජූලි 08 වනදා ප්රකාශයට පත් කරන බව කොළඹ කොටුව මහේස්ත්රාත් පසන් අමරසේන මහතා සඳහන් කළේය.
ඒ අනුව එදින දක්වා සැකකරු තවදුරටත් රක්ෂිත බන්ධනාගාරගත කිරීමට අධිකරණය නියෝග කර තිබේ.
මේ අතර, අදාළ විමර්ශනවලට සමගාමීව හිටපු ජනාධිපති ගෝඨාභය රාජපක්ෂ මහතාගෙන් ද ප්රකාශයක් සටහන් කරගෙන ඇති බව මධ්යම අපරාධ විමර්ශන අංශය අධිකරණයට දැනුම් දී ඇත.
