මුදල් වංචා සිදු කළ බවට චෝදනා එල්ල වී ඇති ‘ත්රිකෝ සමූහ ව්යාපාරයේ’ හිමිකාරිනී තිළිණි ප්රියමාලි වහාම අත්අඩංගුවට ගෙන අධිකරණයට ඉදිරිපත් කරන ලෙස කොටුව මහේස්ත්රාත් පසන් අමරසේන මහතා අද (30) වරෙන්තු නිකුත් කළා.
මෙම සැකකාරිය වෙනුවෙන් ඇපකරුවන් පෙනී සිටින බවට පුද්ගලයන් දෙදෙනෙකු අධිකරණයට ඉදිරිපත් කර තිබුණද, ඔවුන් දෙදෙනා සැකකාරියට පනවා තිබූ වෙනත් නඩුවක ඇපකරුවන් බවත්, අදාළ නඩුවේ ඇප තබා ඇත්තේ ඔවුන් නොවන බවත් තහවුරු වීම හේතුවෙන් මහේස්ත්රාත්වරයා මෙලෙස වරෙන්තු නිකුත් කර තිබෙනවා.
තිළිණි ප්රියමාලි ඇතුළු පුද්ගලයින් 06 දෙනෙකුට එරෙහිව පවරා ඇති මුදල් වංචා චෝදනා ගණනාවකට අදාළ නඩු අද කැඳවූ අවස්ථාවේදී තවත් සැකකරුවන් කිහිපදෙනෙකුම අධිකරණය හමුවේ පෙනී සිට නොමැති බව වාර්තා වනවා.
කෙසේ වෙතත් ඔවුන් වෙනුවෙන් ඇපකරුවන් අධිකරණය හමුවේ පෙනී සිටි තිබෙනවා.
මෙහි තවත් සැකකාරියක වන දැනට රක්ෂිත බන්ධනාගාරගතව පසුවන ජානකී සිරිවර්ධන නමැත්තිය වෙනත් නඩුවකට අදාළව බන්ධනාගාරයේ පසුවන බව ඇය වෙනුවෙන් පෙනී සිටි නීතිඥවරයා අධිකරණයට දැනුම් දුන්නා.
මේ අතර, අදාළ සිද්ධියට සම්බන්ධව ඇප මත මුදාහැර සිටින පූජ්ය බොරැල්ලේ සිරිසුමන හිමියන් අද දින අධිකරණය හමුවේ පෙනී සිටි අතර, උන්වහන්සේ විසින් සිදුකළ ඉල්ලීමක් සලකා බැලූ අධිකරණය විදෙස්ගත වීම සඳහා අවසර ලබාදුන්නා.
ඉදිරිපත් වූ කරුණු සලකා බැලූ මහේස්ත්රාත්වරයා තිළිණි ප්රියමාලි ඇතුළු පිරිසට එරෙහි සියලු නඩු ලබන වසරේ මාර්තු මස 31 වනදා යළි කැඳවීමට නියෝග කරනු ලැබුවා.
