ජූලි 1 වන දා සිට විදුලි බිල පහළ දැමීමට රජය තීරණය කර ඇතැයි විදුලි බල හා බලශක්ති අමාත්ය කංචන විජේසේකර පවසයි.
අමාත්යවරයා මේ බව සඳහන් කළේ, අද (ජූනි 6) පාර්ලිමේන්තුවේදී ය.
එහිදී ගෘහස්ථ කාණ්ඩවලට වැඩි සහනයක් ලබා දීමට තීරණය කළ බව අමත්යවරයා පැවසුවේ ය.
ඊට අදාළ යෝජනාව ලංකා විදුලි බල මණ්ඩලය විසින් හෙට (ජූනි 7) මහජන උපයෝගිතා කොමිෂන් සභාව වෙත භාර දෙනු ඇති බව ද එහිදී අමාත්යවරයා පැවසීය.
ඒ අනුව, ඒකක 0-30 දක්වා ඒකකයක මිල රුපියල් 8 සිට 6 දක්වා ද ඒකක 30-60 දක්වා ඒකකයක මිල රුපියල් 20 සිට 9 දක්වා ද ඒකක 60-90 දක්වා ඒකකයක මිල රුපියල් 30 සිට 18 දක්වා ද ඒකක 120 දක්වා රුපියල් 50 සිට 30 දක්වා පහළ දැමීමට යෝජනා කර තිබේ.
