දුම්රිය රියැදුරන් අද(06) දහවල් 12 සිට මුහුදුබඩ මාර්ගයේ දුම්රිය ධාවනයෙන් ඉවත් වීමට තීරණය කර ඇති බව වාර්තා වේ.
ඒ, ඊයේ දිනයේ සිදුව තිබූ පානදුර හා මොරටුව අතර සංඥා පද්ධතියේ දෝෂය නිවැරදි නොකිරීම හේතුවෙනි.
මොරටුව, මෝදර ප්‍රදේශයේදි දුම්රිය පීල්ලක් කැඩී යාම හේතුවෙන් සාගරිකා දුම්රිය ඊයේ(05) එම ස්ථානයේ නතර කෙරුණේ, එය දුටු පුද්ගලයෙකු දැඩි වෙහෙසක් දරා දුම්රිය නතර කරන ලෙසට සංඥා කිරීමත් සමඟයි.
අනතුරුව දුම්රිය මාර්ගය යළි පිළිසකර කරන තෙක් එම අවස්ථාවේ දුම්රිය මාර්ගය තාවකාලික වසා දමා දැමුණි.
එමෙන්ම, පානදුර සිට කොළඹ කොටුව බලා තවත් දුම්රියක් ධාවනය කෙරි ඇති අතර සංඥාවලින් පෙන්නුම් කර තිබුණේ, බාධාවකින් තොරව දුම්රිය ඉදිරියට ධාවනය කළ හැකි බව හඟවන කොළ පැහැති ආලෝකයයි.
එහිදී එක පීල්ලක එකම දිශාවකට දුම්රිය දෙකක් එකිනෙකෙට ආසන්නයේ ගමන් ගෙන තිබූ අතර අදාළ දුම්රියේ රියැදුරුගේ විමසිලිමත් බව හේතුවෙන් දුම්රිය අනතුරක් සිදුවීමට යාම වැළකුණි.
මෙම ගැටලුවට ක්ෂණිකව විසඳුම් නොලැබුණහොත් මගීන්ගේ ආරක්ෂාව තකා මුහුදුබඩ මාර්ගයේ දුම්රිය ධාවයෙන් ඉවත්වීමට සිදුවන බව ලොකොමොටිව් ඔපරේටින් ඉංජිනේරු සංගමය ඊයේ (05) ප්‍රකාශ කර ඇත.
