පොලිස්පති දේශබන්දු තෙන්නකෝන්ට එරෙහි චෝදනා විමර්ශන කරන විශේෂ ත්‍රිපුද්ගල කමිටුවේ විමර්ශන බොහෝ දුරට මෙම මාසයේදී අවසන් කිරීමට නියමිතව ඇති බව වාර්තා වේ.
විමර්ශන අවසන් වීමෙන් පසු කමිටු වාර්තාව කමිටුවේ සභාපතිවරයා විසින් කතානායකවරයාට භාර දෙනු ඇත.
කමිටුවේ වාර්තාව පරීක්ෂා කිරීමෙන් පසු කතානායකවරයා විසින් ඉදිරි ක්‍රියාමාර්ග ගැනෙනු ඇතැයි පාර්ලිමේන්තු ආරංචි මාර්ග සඳහන් කරන බව ලංකාදිප පුවත්පත වාර්තා කරයි.
මේ අතර සිය ලිඛිත දේශනා එළඹෙන අඟහරුවාදා (08) ඉදිරිපත් කරන ලෙස පොලිස්පති දේශබන්දු තෙන්නකෝන්ට එරෙහි චෝදනා විමර්ශන කරන මැතිසභා ත්‍රිපුද්ගල කමිටුව වග උත්තරකාර සහ පැමිණිලි පාර්ශ්වවලට දැනුම්දී ඇත.
මේ අනුව දෙපාර්ශ්වයේම ලිඛිත දේශන 8 වැනිදා ප.ව. 3.30ට පෙර පරීක්ෂණ කමිටුවට ඉදිරිපත් කළ යුතුය.
මේ අතර පොලිස්පතිවරයාට එරෙහි චෝදනා සම්බන්ධයෙන් දෙපාර්ශවයේම සාක්ෂි වීමසීම පසුගියදා අවසන් විය.
ශ්‍රේෂ්ඨාධිකරණ විනිසුරු ප්‍රීති පද්මන් සූරසේනගේ සභාපතිත්වයෙන් යුතු මෙම කමිටුවේ සෙසු සාමාජිකයන් ලෙස අල්ලස් හෝ දුෂණ චෝදනා විමර්ශන කොමිෂන් සභාවේ සභාපති විශ්‍රාමික විනිසුරු නීල් ඉද්දවල සහ ජාතික පොලිස් කොමිෂන් සභාවේ සභාපති ඊ.ඩබ්ලිව්.එම්. ලලිත් ඒකනායක යන අය කටයුතු කරයි.
