දිට්වා සුළි කුණාටු තත්ත්වය හේතුවෙන් හානි වූ තලෙයිමන්නාරම් දුම්රිය මාර්ගයේ ප්රතිසංස්කරණ කටයුතු අවසන් කර මාසයකට අධික කාලයක් ගතව ඇතත්, එහි දුම්රිය ධාවන කටයුතු යළි ආරම්භ කිරීමට මෙතෙක් පියවර ගෙන නොමැති බව ශ්රී ලංකා දුම්රිය ස්ථානාධිපති සංගමය පවසයි.
එම සංගමයේ ප්රධාන ලේකම් කසුන් චාමර ජයසේකර මහතා සඳහන් කළේ, අධික වැසි සහ ආපදා තත්ත්වය හේතුවෙන් තලෙයිමන්නාරම් දුම්රිය මාර්ගයේ ස්ථාන කිහිපයක් හානි වීම නිසා දුම්රිය ධාවනය තාවකාලිකව නතර කිරීමට සිදු වූ බවයි.
කෙසේ වෙතත්, මේ වනවිට මාර්ග අංශයේ නිලධාරීන් සහ සේවකයින් විසින් අදාළ මාර්ගය සම්පූර්ණයෙන්ම යථා තත්ත්වයට පත් කර ඇති අතර, පැයට කිලෝමීටර් 120ක වේගයකින් දුම්රිය ධාවනය කිරීමට හැකි තත්ත්වයක මේ වන විට දුම්රිය මාර්ගය පවතින බවද ඔහු සඳහන් කළේය.
මීට පෙර මෙම මාර්ගයේ දිනපතා උදෑසන දුම්රිය ගමන් වාර දෙකක්, රාත්රී තැපැල් දුම්රිය ඇතුළු ගමන් වාර කිහිපයක් ක්රියාත්මක වූ අතර, උතුරු ප්රදේශයේ ජනතාව, ආරක්ෂක අංශ සාමාජිකයින් සහ මඩු දේවස්ථානය වෙත ගමන් කරන බැතිමතුන් විශාල ප්රමාණයක් එම සේවාව භාවිත කර තිබුණි.
දුම්රිය එන්ජින් හිඟය ඇතුළු කරුණු හේතුවෙන් ධාවන සේවා යළි ආරම්භ කිරීම ප්රමාද වීම මගී ජනතාවට දැඩි අපහසුතාවක් වී ඇති බවද එම වෘත්තීය සංගමය පෙන්වා දෙයි.
එබැවින්, ප්රතිසංස්කරණ අවසන් කර ඇති තලෙයිමන්නාරම් දුම්රිය මාර්ගයේ දුම්රිය සේවා කඩිනමින් යළි ආරම්භ කරන ලෙස ශ්රී ලංකා දුම්රිය ස්ථානාධිපති සංගමය බලධාරීන්ගෙන් ඉල්ලා සිටී.
