ගතවූ පැය 24 තුළ ඇදහැළුණු වර්ෂාව හේතුවෙන් මහවැලි, කැලණි සහ කළු ගඟ ආශ්රිත ඉහළ ප්රදේශවලට සැලකිය යුතු වර්ෂාපතනයක් වාර්තා වී ඇති බව වාරිමාර්ග දෙපාර්තමේන්තුව සඳහන් කරයි.
එම දෙපාර්තමේන්තුවේ ජල විද්යා හා ආපදා කළමනාකරණ අධ්යක්ෂ ඉංජිනේරු එල්. එස්. සූරියබණ්ඩාර මහතා පැවසුවේ, එම වර්ෂාපතනය හේතුවෙන් අදාළ ගංගාවල ජල මට්ටම් ඉහළ යමින් පවතින බවයි.
ඔහුට අනුව, මහවැලි ගඟේ ඉහළ ද්රෝණියට අයත් නාවලපිටිය, නානුඔය සහ වටවල ඇතුළු ප්රදේශවලට මිලිමීටර් 200කට ආසන්න වර්ෂාපතනයක් ලැබී ඇති අතර, ඇතැම් ස්ථානවල එය මිලිමීටර් 200 ඉක්මවා තිබේ.
ඒ අනුව නාවලපිටිය සිට පේරාදෙණිය දක්වා මහවැලි ගඟ ආශ්රිත ජනතාවට ගංවතුර පිළිබඳ අවදානම් දැනුම්දීම සිදුකර ඇති බව ද ඔහු සඳහන් කළේය. කෙසේ වෙතත්, මේ වන විට ජල මට්ටම් සීග්රයෙන් ඉහළ යන තත්ත්වයක් නොපෙන්වන අතර සාමාන්ය වර්ධනයක් පමණක් දක්නට ලැබෙන බව ද හෙතෙම පැවසීය.
මෙම තත්ත්වය ප්රධාන ගංවතුර ආපදාවක් දක්වා වර්ධනය වීමේ ඉඩකඩ අඩු බව වාරිමාර්ග දෙපාර්තමේන්තුව අපේක්ෂා කරයි. ඊයේ රාත්රියේ ඇතැම් ප්රදේශවලට මිලිමීටර් 70 ඉක්මවූ වර්ෂාපතනයක් ලැබීම හේතුවෙන් ජල මට්ටම් කෙටි කාලයක් තුළ ඉහළ ගිය බව ද සූරියබණ්ඩාර මහතා පැවසීය.
කැලණි ගඟේ ඉහළ ද්රෝණියට අයත් ලක්ෂපාන, නෝර්වුඩ් සහ අවට ප්රදේශවලට මිලිමීටර් 100 සිට 150 දක්වා වර්ෂාපතනයක් වාර්තා වී ඇති අතර, එහි ප්රතිඵලයක් ලෙස කිතුල්ගල ඇතුළු ප්රදේශවල ජල මට්ටම් ඉහළ ගොස් තිබේ.
දැනට එම ජල මට්ටම් ක්රමයෙන් පහළ යමින් පැවතියද, ඇතැම් පහත්බිම් ජලයෙන් යටවීමේ අවදානම තවදුරටත් පවතින බව ඔහු සඳහන් කළේය. විශේෂයෙන් හංවැල්ල සිට අවිස්සාවේල්ල දක්වාත්, අවිස්සාවේල්ල, කිතුල්ගල සහ නෝර්වුඩ් අතර පහත් ප්රදේශවලත් ගංවතුර තත්ත්වයක් ඇතිවීමේ හැකියාවක් පවතින බව ද හෙතෙම පෙන්වා දුන්නේය.
එහෙත් කැලණි ගඟේ ජල මට්ටම් සීග්රයෙන් ඉහළ යාමක් අපේක්ෂා නොකරන අතර, පහළ ප්රදේශවල ජල මට්ටම තවදුරටත් ඉහළ යා හැකි බව ද ඔහු සඳහන් කළේය.
මේ අතර රත්නපුර ඉහළ ප්රදේශයට ද මිලිමීටර් 100කට ආසන්න වර්ෂාපතනයක් ලැබී ඇති අතර, එම හේතුවෙන් රත්නපුර ප්රදේශයේ ජල මට්ටම අවදානම් සීමාවට ළඟාවී තිබේ. කෙසේ වෙතත්, එය සීග්ර වර්ධනයක් නොපෙන්වන අතර පහත්බිම් කිහිපයක් ජලයෙන් යටවීමේ අවදානමක් පවතින බව ද ඔහු වැඩිදුරටත් පැවසීය.
අනෙක් අතට, නිල්වලා සහ ගිං ගඟ ඇතුළු තෙත් කලාපයේ අනෙකුත් ගංගා ආශ්රිත ප්රදේශවලට මිලිමීටර් 50 සිට 75 දක්වා වර්ෂාපතනයක් වාර්තා වී ඇතත්, එය ගංවතුර තත්ත්වයක් දක්වා වර්ධනය වනු ඇතැයි අපේක්ෂා නොකරන බව වාරිමාර්ග දෙපාර්තමේන්තුව පවසයි. එසේම මහ ඔය සහ අත්තනගලු ඔය ආශ්රිතව සැලකිය යුතු වර්ෂාපතනයක් වාර්තා නොවීම හේතුවෙන් එම ප්රදේශවල ගංවතුර අවදානමක් ද මේ වන විට නොපවතින බව ද ඉංජිනේරු එල්. එස්. සූරියබණ්ඩාර මහතා වැඩිදුරටත් සඳහන් කළේය.
