මෙම වසරේ මේ දක්වා දිවයින පුරා ඩෙංගු රෝගීන් 89,639 දෙනෙකු හඳුනාගෙන ඇති අතර, ඩෙංගු ආසාදනය හේතුවෙන් සිදුව ඇති මරණ සංඛ්යාව 65ක් දක්වා ඉහළ ගොස් තිබේ.
මාසික දත්ත අනුව මේ වසරේ වැඩිම ඩෙංගු රෝගීන් සංඛ්යාවක් වාර්තා වී ඇත්තේ ජූලි මාසයේදී වන අතර, එම සංඛ්යාව 29,973කි.
ජූනි මාසයේදී රෝගීන් 21,533ක්, මැයි මාසයේදී 8,590ක්, ජනවාරි මාසයේදී 7,866ක්, මාර්තු මාසයේදී 6,013ක්, පෙබරවාරි මාසයේදී 5,721ක් සහ අප්රේල් මාසයේදී 5,651ක් ලෙස රෝගීන් වාර්තා වී තිබේ.
මේ අතර, අගෝස්තු මාසයේ ගතවූ පළමු දින නවය තුළ පමණක් ඩෙංගු රෝගීන් 4,292 දෙනෙකු හඳුනාගෙන ඇති බව සඳහන් වේ.
පළාත් අනුව සලකා බැලීමේදී වැඩිම ඩෙංගු බලපෑමක් වාර්තා වන්නේ බස්නාහිර පළාතෙනි. එම පළාතෙන් රෝගීන් 47,445 දෙනෙකු හඳුනාගෙන ඇති අතර, එය සමස්ත රෝගීන් සංඛ්යාවෙන් සියයට 52.93කි.
දකුණු පළාතෙන් රෝගීන් 13,302ක්, මධ්යම පළාතෙන් 7,971ක්, සබරගමුවෙන් 7,383ක්, වයඹින් 4,465ක්, නැගෙනහිරින් 3,703ක්, ඌවෙන් 2,482ක්, උතුරු මැද පළාතෙන් 1,574ක් සහ උතුරු පළාතෙන් 1,314ක් වාර්තා වී තිබේ.
දිස්ත්රික් මට්ටමින් වැඩිම රෝගීන් සංඛ්යාවක් වාර්තා වී ඇත්තේ ගම්පහ දිස්ත්රික්කයෙන් වන අතර, එය සමස්ත රෝගීන්ගෙන් සියයට 21.27කට සමාන වේ.
කොළඹ දිස්ත්රික්කයෙන් රෝගීන් 17,765ක්, මහනුවරින් 6,366ක්, මාතරින් 5,953ක්, කළුතරින් 5,841ක්, ගාල්ලෙන් 4,936ක් සහ රත්නපුරයෙන් 4,860ක් වාර්තා වී ඇත. මීට අමතරව, කොළඹ මහා නගර සභා බලප්රදේශයෙන් රෝගීන් 3,613 දෙනෙකු හඳුනාගෙන තිබේ.
මේ වන විට ඩෙංගු මරණ අනුපාතය සියයට 0.07ක් ලෙස සටහන් වන අතර, දිවයින පුරා අධි අවදානම් සහිත සෞඛ්ය වෛද්ය නිලධාරී කොට්ඨාස 119ක් හඳුනාගෙන ඇති බවද වාර්තා වේ.
