ආණ්ඩුක්රම ව්යවස්ථාව සංශෝධනය කිරීම සඳහා ඉදිරිපත් කර ඇති 22 වන ආණ්ඩුක්රම ව්යවස්ථා සංශෝධන පනත් කෙටුම්පත සහ අධිකරණ සංවිධාන සංශෝධන පනත් කෙටුම්පත අද (18) පාර්ලිමේන්තුවට ඉදිරිපත් කිරීමට නියමිතව තිබේ.
අධිකරණ හා ජාතික ඒකාබද්ධතා අමාත්ය හර්ෂණ නානායක්කාර මහතා විසින් පාර්ලිමේන්තුවේ ප්රධාන කටයුතු ආරම්භයේදී අදාළ පනත් කෙටුම්පත් ඉදිරිපත් කිරීමට නියමිත බව වාර්තා වේ.
පනත් කෙටුම්පතක් ගැසට් කිරීමෙන් අනතුරුව සතියක කාලයකින් පළමු වර කියවීම සඳහා එය පාර්ලිමේන්තුවට ඉදිරිපත් කළ යුතු අතර, ඉන් පසුව ඕනෑම පුද්ගලයෙකුට එම පනත් කෙටුම්පත සම්බන්ධයෙන් අධිකරණය හමුවට යාම සඳහා සතියක කාලයක් හිමි වේ.
එලෙස ඉදිරිපත් වන පෙත්සම් ශ්රේෂ්ඨාධිකරණය විසින් විභාග කිරීමෙන් පසු දින 3ත් 21ත් අතර කාලයක් තුළ අදාළ තීන්දුව පාර්ලිමේන්තු කථානායකවරයා වෙත දැනුම්දීමට නියමිතය.
22 වන ආණ්ඩුක්රම ව්යවස්ථා සංශෝධන පනත් කෙටුම්පත සම්මත වුවහොත් ශ්රේෂ්ඨාධිකරණ විනිසුරුවරුන්ගේ විශ්රාම යන වයස් සීමාව අවුරුදු 65 සිට 67 දක්වා ඉහළ යනු ඇත. එමෙන්ම අභියාචනාධිකරණ විනිසුරුවරුන්ගේ විශ්රාම වයස අවුරුදු 63 සිට 65 දක්වා සංශෝධනය කිරීමට නියමිතය.
අධිකරණ සංවිධාන සංශෝධන පනත් කෙටුම්පත මඟින් මහාධිකරණ, දිසා අධිකරණ සහ මහෙස්ත්රාත් අධිකරණ විනිසුරුවරුන්ගේ විශ්රාම වයස අවුරුදු 62 දක්වා ඉහළ නැංවීමට යෝජනා කර තිබේ.
මේ අතර, අදාළ පනත් කෙටුම්පත් දෙක පළමු වර කියවීම සඳහා අද පාර්ලිමේන්තුවට ඉදිරිපත් කරන අවස්ථාවේදී ඊට විරෝධය පළ කිරීමට සමගි ජන බලවේගය ප්රමුඛ විපක්ෂය තීරණය කර ඇති බව වාර්තා වේ.
ඊයේ (17) පස්වරුවේ පැවති විපක්ෂයේ මන්ත්රී කණ්ඩායම් රැස්වීමේදී මේ සම්බන්ධයෙන් තීරණය කර ඇති බව සඳහන් වේ.
එමෙන්ම අදාළ පනත් කෙටුම්පත්වලට එරෙහිව පෙත්සම් ගොනු කිරීමටත්, එම පෙත්සම් විභාග කිරීම සඳහා ශ්රේෂ්ඨාධිකරණයේ විනිසුරුවරුන් 13 දෙනාගෙන් සමන්විත විනිසුරු මඩුල්ලක් පත් කරන ලෙස ඉල්ලීමක් කිරීමටත් යෝජනා වී තිබේ.
