ජ්‍යේෂ්ඨ නියෝජ්‍ය පොලිස්පති රන්මල් කොඩිතුවක්කු ඇතුළු උසස් නිලධාරීන් කිහිපදෙනෙකුගේ ස්ථාන මාරුවීම් අවලංගුයි
ජ්‍යේෂ්ඨ නියෝජ්‍ය පොලිස්පති රන්මල් කොඩිතුවක්කු සහ පොලිස් මත්ද්‍රව්‍ය නාශක කාර්යාංශයේ නියෝජ්‍ය පොලිස්පති අශෝක ධර්මසේන ඇතුළු උසස් පොලිස් නිලධාරීන් කිහිපදෙනෙකුට ලබාදී තිබූ ස්ථාන මාරුවීම් වහාම ක්‍රියාත්මක වන පරිදි අවලංගු කිරීමට ජාතික පොලිස් කොමිෂන් සභාව පියවර ගෙන තිබෙනවා.
ආයතනික අවශ්‍යතා සහ විමර්ශනවල ස්වාධීනත්වය තහවුරු කිරීමේ පියවරක් ලෙස, ජ්‍යෙෂ්ඨ නියෝජ්‍ය පොලිස්පතිවරුන් කිහිප දෙනෙකු වහාම ක්‍රියාත්මක වන පරිදි ස්ථාන මාරු කිරීමටයි පොලිස් මූලස්ථානය පසුගියදා තීරණය කළේ.
එම ස්ථාන මාරුවීම් ලැයිස්තුවට රන්මල් කොඩිතුවක්කු ගේ නම ද ඇතුළත් වුණා.
මේ අතර කොළඹ වරාය පරිශ්‍රයේ බහාලුමක සඟවා තිබියදී සොයාගත් රුපියල් කෝටි 800කට අධික වටිනාකමකින් යුත් ‘අයිස්’ මත්ද්‍රව්‍ය තොගය සම්බන්ධයෙන් ප්‍රකාශයක් ලබාදීම සඳහා අපරාධ සහ රථවාහන භාර ජ්‍යෙෂ්ඨ නියෝජ්‍ය පොලිස්පති රන්මල් කොඩිතුවක්කු ඊයේ (29) අපරාධ පරීක්ෂණ දෙපාර්තමේන්තුව (CID) හමුවේ පෙනී සිටියා.
අපරාධ පරීක්ෂණ දෙපාර්තමේන්තුව හමුවේ පැය 03ක පමණ ප්‍රකාශයක් ලබා දීමෙන් අනතුරුව ජ්‍යේෂ්ඨ නියෝජ්‍ය පොලිස්පතිවරයා පිටව ගියා.
