ප්රවීණ රංගන ශිල්පිනී මාලිනී ෆොන්සේකාගේ නාමය භාවිත කරමින් නිර්මාණය වන බව කියන ‘රැජිණියේ’ චිත්රපටය සම්බන්ධයෙන් රංගන ශිල්පිනී සමනලී ෆොන්සේකා දැඩි විරෝධය පළ කර තිබේ.
ඇය නිකුත් කළ නිවේදනයක සඳහන් වන්නේ, ලබා දෙන බවට දුන් පොරොන්දු උල්ලංඝනය කරමින් සහ මාලිනී ෆොන්සේකාගේ නාමය ප්රචාරණ කටයුතු සඳහා “බාල ලෙස” භාවිත කරමින් එම චිත්රපටයේ රූගත කිරීම් අද දින අත්තනෝමතික ලෙස ආරම්භ කර ඇති බවයි.
එමෙන්ම, මාලිනී ෆොන්සේකා මහත්මියගේ සහෝදර සහෝදරියන් ඇතුළු පවුලේ සාමාජිකයන් නොසලකා හරිමින් මෙම කටයුතු සිදු කර ඇති බවට ද ඇය චෝදනා කරයි.
සමනලී ෆොන්සේකා පවසන්නේ, තම ජීවිතයම ශ්රී ලාංකේය සිනමා කලාව වෙනුවෙන් කැප කළ ශ්රේෂ්ඨ කලාකාරිනියකගේ ජීවිත කතාව, ඇයගේ මරණයෙන් පසුව සුළු පිරිසකගේ වාණිජ සහ පෞද්ගලික අරමුණු සඳහා යොදා ගැනීම කලා ක්ෂේත්රයේ ආචාර ධර්මයන්ට පටහැනි ක්රියාවක් බවයි.
“මගේ ලොකු නැන්දා පිළිබඳව චිත්රපටයක් නිර්මාණය වීම ගැන ඇගේ දියණියක ලෙසත්, ක්ෂේත්රයේම නියැලෙන රංගන ශිල්පිනියක ලෙසත් මම අවංකවම සතුටු වෙමි. එහෙත් එය කුමන ආකාරයේ සිනමාපටයක්ද, එය සිදු කරන්නේ කෙලෙසද සහ එහි අන්තර්ගත වන කතා වස්තුව කුමක්ද යන්න පිළිබඳව සෙවීමටත්, දැනගැනීමටත් ඇගේ පවුලේ අයට පූර්ණ අයිතියක් ඇත.
තිරපිටපත පවුලේ සාමාජිකයන් වෙත ලබා දෙන බවට දුන් පොරොන්දුව අමු අමුවේ උල්ලංඝනය කරමින් සහ මාලිනී ෆොන්සේකා යන නාමය ප්රචාරණ කටයුතු සඳහා බාල ලෙස භාවිත කරමින්, ‘රැජිණියේ’ චිත්රපටයේ රූගත කිරීම් අද දින අත්තනෝමතික ලෙස ආරම්භ කර ඇත.
මාලිනී ෆොන්සේකා මහත්මියගේ සහෝදර සහෝදරියන් ඇතුළු පවුලේ සැම නොසලකා හරිමින් සිදු කළ මෙම අතිශය සදාචාර විරෝධී, වංචනික ක්රියාව අප දැඩිලෙස හෙළා දකිමු. තම මුළු ජීවිත කාලයම සිනමා කලාව වෙනුවෙන්ම කැප කළ ශ්රේෂ්ඨ කලාකාරිනියකගේ ජීවිතය, ඇගේ මරණයෙන් පසුව මෙලෙස සුළු පිරිසකගේ පටු උන්නතිය උදෙසාත්, වාණිජ පරමාර්ථ උදෙසාත් අවභාවිත කිරීම සමස්ත කලා ක්ෂේත්රයේම ආචාර ධර්මයන්ට පටහැනි බව මම වගකීමෙන් ප්රකාශ කර සිටිමි.” යනුවෙන්ද ඇය වැඩිදුරටත් සඳහන් කර ඇත.
මෙම චෝදනා සම්බන්ධයෙන් ‘රැජිණියේ’ චිත්රපටයේ නිෂ්පාදන පාර්ශ්වයෙන් මෙතෙක් නිල ප්රතිචාරයක් නිකුත් වී නොමැත.
