එක්ස්ප්‍රස් පර්ල් නඩුවට අදාළව ශ්‍රේෂ්ඨාධිකරණ තීන්දුව විග්‍රහ කර සවිස්තර ලිපියක්, ජනාධිපති ලේකම්වරයා වෙත යොමුකර ඇති බව වාර්තා වේ.
ඒ, නීතිපති පාරින්ද රණසිංහ විසිනි.
නීතිපති දෙපාර්තමේන්තුව පැවසුවේ, පිටු 361 කින් සමන්විත නඩු තීන්දුව අධ්‍යයනය කිරීමෙන් අනතුරුව නීතිපතිවරයා විසින් එම ලිපිය යොමුකර ඇති බවයි.
මේ අතර, එක්ස්ප්‍රස් පර්ල් නෞකා සමාගමෙන් වන්දි අය කර ගැනීම සඳහා ශ්‍රේෂ්ඨාධිකරණය ලබා දුන් නඩු තීන්දුව පිළිබඳ සාකච්ඡාවක් දෙන්නැයි නීතිපති දෙපාර්තමේන්තුව ජනාධිපතිවරයාගෙන් ඉල්ලීමක් කර ඇත.
නීතිපති දෙපාර්තමේන්තුව පැවසුවේ නඩු තීන්දුවෙන් නියෝග කිහිපයක් පනවා ඇති බවයි.
ඒ පිළිබඳ ජනාධිපතිවරයා ඇතුළු පාර්ශ්ව දැනුවත් කර ඉදිරි ක්‍රියාමාර්ග පිළිබඳ එකගතාවයට එළඹීම සඳහා එම සාකච්ඡාව පැවැත්වෙනු ඇත.
ශ්‍රේෂ්ඨාධිකරණය නෞකා සමාගමට නියෝග කළේ, නෞකා අනතුරින් සිදුවූ පාරිසරික හානිය වෙනුවෙන් අමෙරිකානු ඩොලර් බිලියනයක වන්දියක් වසරක් තුළ ගෙවන ලෙසයි.
එම සම්පූර්ණ වන්දි මුදල ලබා ගැනීම සම්බන්ධයෙන් ද අධ්‍යනය කරමින් සිටින බව නීතිපති දෙපාර්තමේන්තුව පැවසීය.
